سِِقا العارض الغالي مِن العارض البراق
من أول دخـول الوسـم يالله بوسمِيـه
يمسي قصير طويق بالخيـر والارزاق
وتصك الفياض اللى جنوبيـه وغربيـه
منازل سنايد راعـي البيـرق الخفـاق
مرابي رجال بأحمـر المـوت محميـه
رجالٍ على مايرضـي الله لهـا ميثـاق
وحياة العلوم وموتها في ضحى الهيـه
تِقوم وتطيح علوم لا نشفـت الاريـاق
تبين خدين الشمس مِـن غانـم الفيـه
سما بيرق معزي على شاهـد الآفـاق
عـزالله أن نيـة معـزي هـي النيـه
رسمها وسماها..وفزت لهـا الاعنـاق
ورسى في قلوب الناس حب (السعودية)
سقا الله مساري من سرى والهِ تـواق
منـاوي مقاضيـب الرهـاف اليمانيـه
سقا من مشى في ساقته شاقه اللى شاق
هوى الوارديـن الصامليـن النداويـه
وسلامي عليهم ماسرى الوجد بالمشتاق
من اول وطا (سمحان) لين (المحليـه)
طرى للسهر طاري وانا غيبة الاشفاق
وتهجيت غربـي الريـاض وجنوبيـه
تلقيت ريضان (البطين) وثنيت السـاق
تطامنت باسم الله علـى جـال مطويـه
تذكرت خلانـي وحـب دفـن باعمـاق
هذيك القصور اللى من الطيـن مبنيـه
صباح النخل والطير والهيل والمشـراق
مسا البال لا صبح والحيـاة الشقاويـه
هجدها النوى وجروح الايـام ماتنطـاق
وخذت ماخذت وجروح الايـام منسيـه
تمادى الليالي الجاريه والدروب ضواق
تعاوى الهمـوم معسوسهـا السنافيـه
وحياة الثرى مافيهم اللى بهمـه ضـاق
على مـا تيسـر نارهـم دايـمٍ حيـه
فلاليح زرع وفالحين القلـوب اشـواق
وجمالـه فـي زملهـا كـل مـاويـه
رجالٍِ تطاول شمخ طويـق مـا تنعـاق
تغزلـه دروب وتفتلـه روحـه وجيـه
تقد الصفا زمل الوفا والحفا مـا عـاق
ابالقد لا جا الجـد صـوره لهـم حيـه
وسرى الليل والدنيا ليالي وصل وفراق
وانا مانسيت شموخ الاحبـاب مطفيـه
بقى للغلا باقي تـرى للثـرى عشـاق
تعـد الليالـي والنـجـوم السمـاويـه
وانا اعد وامحا وانتظر واحترق واشتاق
متى يصدف الوسمي على طويق وسميه